Daromadni kanal egalari bilan boʻlishish

Bugun ijtimoiy tarmoq tarixidagi eng saxiy mukofot tizimlaridan birini taqdim etmoqdamiz. Telegram kanallar egalari endi kanallarida namoyish qilingan reklamadan tushgan daromadning 50% qismini olishi mumkin.

Ijodkorlar uchun mukofotlar

Telegram foydalanuvchilari har oy kanallarda 1 trilliondan ortiq koʻrishlarni hosil qiladi. Bugundan boshlab kamida 1000 ta obunachiga ega ommaviy kanal egalari kanallarida namoyish qilingan reklamalardan tushgan daromadning 50 qismi bilan mukofotlanadi.

Kanal egalari mukofotlarini komissiyasiz yechib olishi yoki ularni Telegram reklamalari, kolleksiya qilinadigan foydalanuvchi nomlari yoki Premium yutuqli oʻyinlarga qayta investitsiya qilishi mumkin.

Kanalingiz monetizatsiya statistikasini koʻrish uchun Kanal sozlamalari > Statistika > Monetizatsiya rukniga kiring. Kanal egalari uchun yechib olish imkoniyati kelgusi haftalarda Fragment saytida paydo boʻladi.

TON asosidagi reklamalar

Mukofotlash dasturi uchun biz Toncoin (TON blokcheyni asosida ishlovchi kriptovalyuta) bilan xarid qilish mumkin boʻlgan yangi turdagi reklamalarni taqdim etmoqdamiz.

Biz TON blokcheynini past komissiyalar, oʻtkazmalarni qayta ishlashning yuqori tezligi va soniyasiga rekord hajmdagi oʻtkazmalarni dastaklashi sababli tanladik.

Endi istalgan foydalanuvchi Toncoin evaziga minimal budjet bilan Telegramdagi bot yoki kanalini reklama qilishi mumkin. Reklama xabarini yaratganda joylash uchun muayyan kanallarni tanlaysiz, buning evaziga siz reklama namoyish qilinadigan kontekstni toʻliq nazorat qilasiz.

Ishni boshlash uchun shunchaki Telegram Reklama platformasiga kiring.

Nega Telegram Reklama oʻziga xos?

Telegramdagi reklama xabarlari boshqa platformalardagi reklamaga oʻxshamaydi. Ular faqat yirik ommaviy kanallarda chiqadi. Reklamalar chatlaringizda, chatlar roʻyxatida yoki ilovaning boshqa ekranlarida hech qachon chiqmaydi.

Telegram yangi reklamalarni targetlash uchun shaxsiy maʼlumotlardan foydalanmaydi. Reklama xabarlari mazmuni faqat ular chiqadigan muayyan kanallarga bogʻliq, kanal egalari esa namoyishlar uchun mukofotlar oladi.

Biz reklamalar hatto kontent ijodkorlarini qoʻllab-quvvatlasa ham hammaga ham yoqmasligini tushunamiz. Yaxshiyamki, Telegramda istalgan kishi Telegram Premiumga obuna boʻlish orqali reklamalarni faolsizlantirishi va oʻnlab ekskluziv funksiyalar, jumladan, yangi Telegram Biznes funksiyalariga ega boʻlishi mumkin.

2024-yil, 31-mart,
Telegram jamoasi