Kolleksiyalanadigan hadyalarni taqish, hadyalarni blokcheynga yuborish, kanallar uchun hadyalar va boshqalar

Bugungi yangilanishda Telegramga 6 ta yangi funksiya qoʻshildi, jumladan, kolleksiyalanadigan hadyalarini emoji status sifatida taqish, hadyalarni blokcheynga koʻchirish, kanallarga hadyalar yuborish va boshqalar.

Unikal hadyalaringizni taqing

Siz kolleksiyalanadigan qilib yuksaltiradigan hadyalarni endi unikal emoji status sifatida ishlatishingiz mumkin.

Hadyani status sifatida ishlatish unga miltillovchi yulduz effektini beradi hamda profilingiz koʻrinishini fon va kolleksiyangizdagi belgiga moslashtiradi.

Hadyalaringizdan birini taqish uchun Profilim > Hadyalar rukniga kiring, Hadya bandini bosing va “Taqish” bandini tanlang. Agar keyinchalik hadyani yechsangiz, profilingiz asl koʻrinishiga qaytadi.

Hadyalarni blokcheynga oʻtkazish

Kolleksiyalanadigan foydalanuvchi nomlari va raqamlar kabi hadyalar endi TON blokcheyni orqali oʻtkazilishi yoki auksionga qoʻyilishi mumkin. Bu egalariga doimiy nazorat beradi — hatto ular Telegram hisobiga kirishni yoʻqotsa yoki uni oʻchirib tashlasa ham.

Hadyani TON hamyoniga oʻtkazish sizga auksion saytlar yoki kolleksiyalanadigan hadyalar uchun qoʻshimcha imtiyozlar taklif qiluvchi platformalar kabi tashqi xizmatlarga ulanish imkonini ham beradi.

Hadyalarni blokcheynga oʻtkazish uchun Sozlamalar > Profilim > Hadyalarim rukniga kiring va hadyalaringizdan birini bosing, keyin Oʻtkazish > Blokcheyn orqali yuborish bandini tanlang.

Kanallarga hadyalar berish

Bayramlar va yutuqlarni nishonlash uchun endi Telegram foydalanuvchilari kanal profilida koʻrsatilgan hadyalar yuborish orqali kanallarni tabriklashi mumkin.

Doʻstlarga hadyalar yuborish kabi obunachilar hadyani yuborishdan oldin yulduzlar yordamida hadyani yuksaltirishi mumkin — bu esa oluvchiga uni bepul unikal kolleksiyalanadigan hadyaga aylantirish imkonini beradi.

Kanalga hadya yuborish uchun kanalning pastki burchagidagi hadya belgisini bosing.

Kanal egalari oʻz hadyalarini boshqa foydalanuvchilar va kanallarga oʻtkazishi yoki blokcheynda auksionga qoʻyishi mumkin. Kontent ijodkorlari va xayriya tashkilotlari ushbu funksiyadan maxsus loyihalar va muhim maqsadlarga mablagʻ yigʻish uchun foydalanishi mumkin.

Eslatma: Kanallarga hadyalar bosqichma-bosqich taqdim etiladi va barcha joyda darhol mavjud boʻlmasligi mumkin.

Hadyalarni ulashish

Profilingizdagi kolleksiyalanadigan hadyalarni hikoyangizga joylashingiz mumkin — bunda unikal sanʼat asaringiz va omadli raqamlaringizni namoyish qilish uchun nafis animatsiyali koʻrinish hosil qilinadi.

Hadyani hikoyangizga joylash uchun Sozlamalar > Profilim > Hadyalarim rukniga kiring, hadyalaringizdan birini tanlang va Ulashish > Hikoyaga joylash bandini tanlang.

Har bir kolleksiyalanadigan hadya doʻstlaringizga ulashishingiz yoki kanalda joylashingiz mumkin boʻlgan t.me/nft formatidagi unikal havolaga ega.

Kanallar profillarida hadyalarni filtrlash

Kanallar profillaridagi “Hadyalar” sahifasi hadyalarni ularning qiymati va kolleksiyalanish holati, qabul qilingan sanasi va cheklangan yoki cheklanmagan toʻplamdan ekaniga qarab saralash uchun filtrlarni oʻz ichiga oladi.

Adminlar kanallariga yuborilgan hadyalarni kuzatib borish uchun kanallarining Hadyalar sahifasidan bildirishnomalarni yoqishi mumkin.

Telegramning yanvar oyidagi ikkinchi yangilanishidagi yangiliklar shulardan iborat. Barcha eng yaxshi hadyalarimizni sinab koʻrgandan keyin tez orada qaytamiz.

2025-yil 24-yanvar
Telegram jamoasi